NA LLUNA HAI UNA VIEYA FILANDO

El folclore llionés relacionáu cola astronomía nun ye especialmente ricu, al menos en comparanza con outros ámbitos de la cultura llionesa. Sicasí, nun deixa de ser ésti un tema interesante, abonda con mirar al cielu una nueite sin ñubes pa decatase de la formosura de la bóveda celeste y pa que nos perguntemos qué figuras vieron nel cielu los nuesos buelos, los nomes que-ys dioron y qu’importancia atribuyeron a los cuerpos celestes.

Nun hai duda de que los astros más destacaos del firmamentu son las duas lluminarias, el sol y la lluna, que la mentalidá popular llionesa lliga afirmando que son home y muyer respectivamente, o qu’entrambos los dous están enemistaos y por eso evítanse saliendo’l sol pol día y la lluna pola nueite. Mui conocíos son los ritos y tradiciones propios de la nueite de San Xuan, cristianización de vieyas celebraciones que conmemoraban el solsticiu de branu. Una costume llionesa conectada con esta fecha que pervivivíu hasta hai poucas décadas foi la de madrugar el 24 del mes de san xuan pa ver baillar el sol nesa alborada máxica.

Más significativa foi la importancia de la lluna nas creencias llionesas que seguramente tien precedentes bien antiguos ya que’l creciente de la lluna apaez en numarosas llábanas funerarias de los ástures, lo que puede evidenciar el sou carácter sacro pa esti puebru prerromanu. Estrabón al tratar de las xentes de norte de la península ibérica na época romana dixo que tenían una divinidá sin nome a la que daban cultu nas nueites de lluna chena. En todu casu, anguaño inda ye posible constatar un buen feixe de tradiciones populares na nuesa tierra cola lluna como eixe y qu’Antonio Viñayo resume d’esta miente: “El calendario, al menos alternativo y paralelo, del medio rural leonés, media el tiempo hasta nuestros días, más por la luna que por el sol, Eran la luna y las lunaciones, particularmente el creciente y el menguante, quienes regían la vida rural. Más que por meses y estaciones se nombraban el tiempo por la luna: luna de San Blas, luna de San Andrés… Era también la luna la que regulaba los tiempos de la siembra, de la poda y de la corta de los árboles, del sacrificio del cerdo, de la recolección de los nabos, el apareamiento y castrado de los animales, el esquileo de los rebaños y hasta la tonsura de cabello y el rapado de la barba en los humanos.” Al respective d’esti apunte en dalgunas comarcas de Llión tovía podemos rastrexar la costume de cuntar el pasu del tiempu por nueites y non por días, asina en Os Anacares “anoite” significa ayeri, y en La Forniella “anhueiti” espresa tamién ayeri, o “intanhueiti” quier dicir antias d’ayeri. Esta fórmula de cuntar por nueites y non días debíase a que pola nueite podía vese la lluna y la sua evolución lo que sirvía pa midir el trescursu del tiempu. Esta costume inda vive en celebraciones actuales como la mentada nueite de San Xuan o na Navidá-Nueitebuena onde l’anicu de la celebración márcalu l’anueitecer de la víspora de la fiesta.

Una tradición mui estendida por tierras de Llión ye la que diz que na lluna hai una persona descrita nunas lliendas como un lladrón qu’está eillí castigáu polos sous crímenes, outras tradiciones refieren que ye un home cargáu con un feixe d’espinos, pero la más guapa ye la qu’afirma que na lluna hai vieya filando.

Muitos de los nomes oficiales o cultos de planetas, estrellas y constelaciones tienen orixe na mitoloxía greco-llatina, pero las suas denominaciones populares suelen ser más variadas. Asina, la Vía Láctea recibe na nuesa tierra’l nome de Camin(u) de Santiago. Una antigua tradición europea esplica esti nome indicando que l’apóstol Santiago apaecíuse al emperador Carlomagno na Vía Láctea pa señalar el caminu que tenían que siguir aquellos que quixeran pelegrinar a la sua tumba nos confines galaicos. Los campesinos llioneses dicen que’l Caminu de Santiago muestra nel cielu la vía terrestre que tienen que triar los pelegrinos hasta Compostela. Un rastru d’antiguas creencias sobre l’antropomorfismu de la Via Láctea descubrímoslu nuna designación zamorana de la mesma, “Rodella de Santiago”.

En diferentes zonas de la provincia de Llión la Osa Mayor ye conocida como El Carru, El Carro Triunfante o El Carrellín (tamién El Carrel.lín), pola sua forma que semeya un carru sin ruedas. Outramiente, la Osa Menor ye en Los Argüeyos La Madreña Taruguera, por recordar vagamente la sua figura a la del típicu calzáu llionés.

De carácter descriptivu ye’l nome llionés Sietrestrellu o Sietestrellos pa referise a Las Pléyades, al ser siete estrellas las que paecen formar esa constelación; outros nomes llioneses de la mesma son La Piña, por estar las estrellas n’apariencia mui xuntas anque bien diferenciadas, y Las Cabriellas, Las Siete Cabriellas o Cabrillas, denominación seique pastoril. En muitas variantes de La lloba parda, el más típicu romance pastoril llionés, apaez mentada esa constelación con esti nome, como vemos nesta estrofa d’una variante zamorana del romance:

                         Estando yo en la mi choza
                         pintando la mi cayata
                         Las Cabrillas altas iban
                         y la luna rebajada (…)

Un refrán de los Picos d’Europa llioneses diz que: Nun nacio ni nacerá el que Las Siete Cabriellas verá, y que alude a la dificultá que tienen dalgunos observadores pa ver las siete estrellas de la constelación ya qu’una d’ellas, Mérope, ye menos brillante y cuasi paez que seyan seis las estrellas axuntadas.

De matiz cristianu ye’l nome de Las Tres Marías, tres estrellas pertenecientes a la constelación d’Orión fácilmente reconocibles por apaecer alliniadas. Una tradición argoyana diz que cuando esti conxuntu d’estrellas tocaba aparentemente un determináu puntu de la tierra yera hora de finalizar los filandones. En L.laciana outru refrán recuerda idéntica tradición: Cuando las Tres Marías chegan al Tesetón, salen las mozas del filandón. A partir de determinada época del añu Las Tres Marías desapaecen del cielu llionés como remembra un ditu del valle del Esla: No ha nacido ni nacerá el que Las Tres Marías en mayo verá. Outru refrán d’esa zona resume asina las constelaciones más destacadas del firmamentu visible na nuesa tierra: Por lo más alto del cielo camina el Carro Triunfante, las Tres Marías detrás y el Siete Estrellos delante.

Por outru llau, el planeta Venus, visible solo al amanecerín ya al escurecerín, ye en llionés El Lluceiru. Nel Valle del Esla tamién se-y chama Arrata Yeguas, ya que la sua apaición celeste señalaba la hora d’arratar al ganáu caballar que se deixaba pastiando nos praos a primer hora de la mañana.

Nun inspiráu cantar llionés, y con esto remato esti breve repasu a l’astronomía popular llionesa, describese d’esti xietu tan poéticu el recorríu de las estrellas pol cielu nocturnu:

                             Las estrel.las cuerren, cuerren,
                             you nun deixo de correr,
                             ya onde m’alcuentre la nueite,
                             al.lí quiero arborecer.

[Escribí esta nota etnográfica alredor del 2000 o del 2001. Güei que se conmemora la chegada del home a la lluna queda eiquí como homenaxe a aquellos pioneiros]

Esbilla | del.icio.us